En dolle Umzug - un die Flomerschummer war`n debai

Ich kann eich sage, selde werd wohl e Ereignis so lang in Erinnerung bleiwe, wie der dolle Umzug zum 425-jährische Stadtjubiläum in Frankdedahl im Mai dess Johr. Was do die Vereine, Inschdidutione und Grubbierunge uff die Bä gschdellt hän, ei des war jo sagenhaft un hot alle Mensche begeischdert.

Un Flomerschum hot nadierlich mitgemacht. Lang hän se iwwerleggt, die Flomerschummer, die wu in de AGF-Sitzunge hocken (ehr wisst jo, dess iss die Arbeitsgemeinschaft) un sich fers ganze Derfel was oifalle losse missen. "Ja, was solle mer donn ferr en Beidrag bringe, hot jemand e Idee?" hot de Vorsitzende vun dere Vereinischung, de Rainer Hannemann, wu a bekannt is durch soi dolli Musik am elektronische Glimberkaschde, gfroogt. Diefes Schweige. Bis meer als de Schriftfiehrerin vun dem Club oigfalle is, dass merr doch en "Historische Stammdisch" hän (im Moment isser bissel oigschlofe), wu viel Alde un Äldere schun verzehlt hän, wies mol frieher in Flomerschum so war. Do hab ich gsaat: "So en Stammdisch kennt merr uff en Wagge stelle, e paar Äldere an de Disch setze und drumrum e paar Bilder vun alte Flomerschmer Gebäude und Plätz uffhänge odder vielleicht vun de alde Schul, die is jo schließlich schun hunnert Johr. Dess iss doch historisch und det zu dere Sach in Frankedahl basse." Un werklisch, kenner hot was degesche ghat, im Gegedäl, jeder hot noch e bissel was an Zusatzideeje beigsteiert und schun war de Flomerschummer Wagge in de Leit ere Vorstellung.

Jetzt isses an die Ausfiehrung gange - un des is jo meischdens noch e schwierischeres Thema als de Oifall selbschd.

Do hän sich de Vorsitzende Hannemann un de Ortsvorsteher, de Dietmar Borth, nadierlich mäschdisch ins Zeig geleggt, donn bis zum Umzug war gar nimmi so lang Zeit un alle annre Vororde hän schun ehrn Beidrag ogemeld ghat bei de Stadt.

De Harald Mechnich hänn se dann gfroogt, der konn jo alles: plane, baue, Maderial beischleppe, Leid zum Schaffe animiere, selbschd schaffe wie e Dier, also en bessere kennt's Derfel jo a net hawwe. Un als ich demm in re Sitzung, wu er newer mer ghockt hot, ins Ohr gflischdert hab, dass e aldi Kisch hinner unserm geplonte Wagge a noch schä wer, heer, do hot der Harald jo glei gsaat "mache merr". Do war ich baff.

De Dresslers Bernd, a so en Freundlische un Hilfsbereide, wann's ums Derfel geht, hot glei en große Ahänger zur Verfieschung gstellt und dezu noch soi großi Hall mit Strom un allem was mer fer so e Baschdelei braucht. Un Helfer aus de Reihe vun de AGF sin a kumme. 'S sin zwar immer widder die selwe, wu was machen, awwer denne Schaffer gheert heit mol moi besonneres Lob.

Die AGF hot a 's Scheidweiler's oigspannt, de Stefan un soi Fraa Annette, die sin jo Fachleit beim Uffbau un Beschrifde (die machen nämlich ganze Messeständ mit allem Pipapo un noch viel anneres) un hän doch werklisch iwwer ehrn Combjuder glei en Ausdruck parat ghat, wie der Flomrschummer Wagge aussehe soll. Des sin jo a schun lang Flomerschummer, a wann se net do gebore sin. Un net genung, die hän a fleißisch Hand mit ogeleggt, die 100jährisch Grundschul uff denn Wagge vum Bernd gezimmert, also net bloß e Bild, hän gebenselt, gemesse, geklebt, gemalt. Un de Hannemann und de Borth, die waren a debai. Un alle zwä hän a gebenselt, gebabbt un gsägt. Dann noch de Kuhn Peter vum Gsangverein, de Müller Rolf und de Habel Werner von de Zwiwwelböck, alles Leid, uff die mer sich verlosse kann. Ich hoff, ich hab kenner vergesse?

Ich bin donn alsmol higange in die Hall vum Bernd un hab geguckt, was aus dere Idee worre is, mer is jo neigierisch, mer is jo e Fraa!

Un wie ich am erschde Owend moin Kopp in die Hall gstreckt hab, do hot doch de Harald glei gsaat, dass ich besser was zum Esse gebrocht hät. "Ei dess hätt mer meer nur sage misse" hab ich zurickgsaat und bin mit moim Micra-Flitzer (moi Enkel nennen moi klä Audosche "Knuffi") hämgeraast und hab alles aus em Kühlschrank geraamt, wu essbar war.

Moi Mudder, die Hella, hot a noch e bissel Kees un Hausmacher beigsteiert und ruck zuck hämmer belegde Brode gemacht ghat, e Gummer druff und ab zu denne Arweidswüdische. E Bierche hän so schun dort ghat (dess war jo klar) un glei war doch's schenschde Biffee uffgebaut - un gschmeckt schoint's a zu hawwe, die Bladde waren leer.

"Moje mach ich eich e Gulaschsupp" hab ich gsaat und moi Verschbreche a ghalte. Dann hab ich en halwe Daag in de Kisch gstanne un gschnibbelt un gebrutzelt, ich hab nämlich so e uffwendisches Rezept vun re Gulaschsupp - awwer gut isse, meer un moiner Familie schmeckt se jedenfalls. Ich hab gedenkt, wann ich schun net de Bensel schwinge odder die Grundschul uff demm Wagge verbutze kann, do muss ich halt fer die Magefiller sorge. Un ich glaab, denne Schaffer hot's gschmeckt.

Un dann warer ferdisch, de Flomerschummer Wagge un 's hän sich Leit gfunne, wu sich in dolle alde Uniforme (un's Lääne hän se a noch selbschd bezahlt, alle Achdung!)um denn Stammdisch gsetzt hän.

Do war de beliebte Grundschullehrer Peter Fruth als kräfdisch gebauder Schmied (wirklisch historisch hodder ausgsehe), de Peter Kuhn als fescher Feierwehrmann mit me goldne Helm, de Harald Mechnich als gemiedlich wirkender Metzger, de Dieter Wagenhoff als Parrer wie aus em Bilderbuch, de Udo Böhm als vornehm-adlisch wirkender Jäger mit Schabbobluus, de Richard Fruth als verschmitzder Bäcker (bloß soin neimodische Schorz hot net so gebasst, män ich) un de Dogder Henning Vogel als vornehmer Rischder mit wallendem grauem Langhoor-Lockekopp un Talar. Soi moderni Brill hotter sogar vun de Nas gsetzt, weil die net zum historische Autfit gebasst hett.

Und newerm Wagge is de Ortsvorsteher als keebbehangener Dorfbüttel mit de Schell geloffe, hot soi Dochter Lucia im goldische Biedermeierkleedche mit Schirmsche debei ghat und nadierlich net zu vergesse de Rainer Hannemann als fescher Hochzeider mit Zylinder (schad, hän manche Fraue gsaat, dasser schun verheirat is).

Newer demm Schuluffbau uff demm Flomerschummer Wagge (ganz echt hott die Schul ausgsehe) hot noch e uraldes Schulbänkel gschdanne mit em Uwe Engelhard soine zwee scheene blonde Mädcher als brave Schülerinne. Vornedro in strenger Pose mit Spitzbart und Gehrock de Rekdor vun de Grundschul, de Lehrer Helmut Roth. Der hot vielleicht "echt" ausgsehe, so wie merr sich en Lehrer vun vor hunnert Johr halt vorstellt, streng halt. Awwer de Helmut Roth ist jo in soim Job alles annre als en strenge Erzieher. Un mit me Stock hotter uff die mit deitscher Schrift beschriwwe Daafel gezeigt, wu druffgstanne hot "Flomersheim grüßt Frankenthal und seine Gäste". Des hän sicher alle Leit lese kenne.

Un in die klasse gemacht "Bäuerliche Küche um 1900", wu de Harald, ehr wisst jo, de Mechnich, dann ruck-zuck mit urisch alde Meewel (wu hotter die bloß herghat?)und Bindel vun junge Zwiwwle drumrum un me große Ortwappe vun Flomerschumm gezaubert hot, hän sich die Christel Müller, die Birgit Bruder un die Rosel Pollich gsetzt und so gemacht, als deden se schaffe: Weißkaut hän se ghowwelt, gebiggelt un so weider, alles wie frieher. Un die Klamotte, wu se oghat hän, die waren aus gfärbde Loindicher schnell geneeht. Doll hän se ausgsehe. Un wer hot die zwä Flomerschummer Wägge durch die mit hunnerddausende vun Mensche bevölkert Strooß gfahre: nadierlich de Bernd Dressler und de .............des nenn ich mudisch, bei so viel Menschemasse in de Stadt.

Un die Marianne Nickolaus, die hot die Idee ghat, e aldes Bollerkärchel zu schmicke mit alde Kiche- un Gaadegeräde un is mit ehre Freundin vun de Gfliggelzichter, de Fraa Loch, a mitgeloffe. Ja un die "Vogelfreunde 68", meer sagen als die Veggler, wu a in de AGF verdrede sind, die hän jo werklisch a mol was mitgemacht un sin im Flomerschummer Dross mitgeloffe. Zu dritt sin se - e Fraa war a debai - als Voggelhännler in super Koschdüme kumme, nadierlich die Voggelkewwisch uffem Buckel. En dolle Oifall, muss ich sage.

De Anton Pollich vun de Zwiwwelböck hot ganz wunderbare Bilder gemacht mit soim Foto, ich war ganz nerrisch, wie ich die no dem Umzug gsehe hab. Ich hab merr se faschd all bestellt, dess is doch äfach e scheeni Erinnerung. Un immer widder wann ich se betracht, denk ich "ach Gott, war des alles so kloor".

Ich hab en Vorschlag fer die AGF: Meer kennten demnächschd im Sängerheim noch mol fer alle inderessierde Leid denn Videofilm vum Umzug in Frankedahl zeige. Vorher gibt's Kaffee un Kuche. Do kennte merr all nochmol des dolle Ereignis genieße. Weer dess nix?

Eier Flomerschummer Pressefraa: Ursula Lutz (vun all Ursel genennt).